唔開心

昨日, 其實又想逃避唔返屋企食飯,
最後都係返咗,
食飯時:
爸: 你聽晚唔得閒嚟食飯咩?
我: 做咩呀? 我唔知喎..
媽: 個餐啱啱好呀, 多咗佢咪突咗一個人囉, d 湯邊夠分呀? 不過可能victor 唔嚟, 唔嚟就ok 囉...
爸: 咁咪叫多d 餸囉, 唔得既咩?
媽: 會, 多咗人會叫多d 餸既...

真係好hurt, 原來我連後備都不如,
食完飯, 洗埋碗,
都未夠九點, 我走人喇.
返嚟屋企都唔夠一個鐘...

我後唔後悔返屋企呢?
唔後悔, 起碼俾爹d 知道,
我係被人孤立咗,
點解我會咁唔受歡迎?
唉... 我都唔知,
總之我在意既人,
人唔在意我,
個心真係好hurt, 好hurt...

沖涼時, 我忍唔住喊咗出嚟,
係咪個心好d?
好d 吧...
只係每次提起,
感覺so bad

ex-bf

前幾日係whatsapp, 係樹仁個group 入面,
知道ex-bf 既消息...
佢已經結咗婚,
仲有一個八個月大既小bb....
我個心其實係突一突...

今日, 好偶然, 係七月十一日,
突然醒起係佢既生日.....

我係只係不停咁諗,
佢結咗婚, 我都結咗婚.....

時間真係過快,
同佢分開, 我估都有over 十年吧...

其實我無咩嘢,
只係突然有感而發...

發脾氣

好唔開心, 成日話早去早回,
即係幾點返? 一點? 兩點為之早返嗎?

點解要我一個人等?
係屋企幾粒鐘,
淨係玩電腦,
好悶~~~~~~~~~~~~~~~~~~~~~~~~

又話要生仔,
晚晚咁"早"返,
算吧啦

我決定以後要早瞓,
你遲返就遲返,
唔想返都可以,
我好嬲好嬲好嬲好嬲~~~~~~~~~~~~~~~~~~~~~~~

買衫記

昨晩去阿媽屋企食飯,
放咗工先去行一陣荃灣先...
行到一間舖頭,
見到件衫都ok....

sales girl 話好睇,
仲襯理我著緊條褲.....

俾錢時, 佢先問我皮膚好點keep,
我話我唔化妝,
又比較早瞓....
跟住又問係咪未結婚,
又問我夠唔夠三十歲...

傾傾下, 原來大家都有個共同問題,
就係都係想生小朋友,
不過佢想生,
係因為男朋友唔肯結婚,
想有咗嚟結婚......

我話咁樣好無保障喎,
係咪有小朋友就一定結婚先....
再加上佢男友晚晚都去玩....
跟本唔定性....

佢話佢細我四年,
其實都差唔多係結婚既時候,
只係男友唔肯....

又聽到隔離舖d sales 話一齊咗十幾年都唔結婚,
最後男人有咗第二個,
飛咗佢.....

唉... 女人就係咁,
女人既光輝時間唔多,
過咗三十幾就唔經貴.....
又怕男友唔要自己....

其實我話單唔單身,
都有好同壞處,
只係睇下你點諗....

如果真係有咗而男人最後都唔要你...
咁既身世咪仲慘.....

掛卵期出血... 擔心中

都係第一次咁樣....
明明2/2 係排卵期,
點解會有少少.... 好少既血出現...
好似想嚟月經咁....
因為腹部有少少脹痛...

我好驚, 一直無留意上網問下...
係咪有事呢?
會唔會影響生小朋友呢?

今日睇過一d 討論,
唔係成日係咁,
係無事既...
再睇下過多幾日點啦...

感謝你... 老公

生病確實好容易打動人的心.....

其實自從結婚以來,
我都無咩大病小病,
可能我已經接受咗依個新屋企...
雖然間中亦有唔開心,
但大家都好努力去維繫,
特別係奶奶生病, 到離開,
我理解到佢既唔開心.....

自從奶奶走後,
老公對我比以前還細心,
更加照顧我,
被重視既感覺,
令我覺得好幸福.....

前晚我開始作病,
昨晚老公特別為我煮咗粥食....
煲粥並唔係容易既事,
又要整皮蛋, 又要手撕瘦肉,
又怕煲粥"chi"煲底,
又要幫我整第二日既lunch box.....

自結婚以來,
他做的事, 一直令我感動著.....
謝謝你... 老公...

又係我錯?

二家姐星期日生日,
話說要約日子食飯,
早兩個星期已經係whatapps 問約邊日食飯,
傾傾傾,
二姊夫話不如正日星期日夜晚食晚飯,
二家姐話唔得, 大哥哥要上堂,
最終無講定邊一日.

昨日又係apps 問,
二姊夫話不如星期日中午食飯,
無人話得定唔得.....
又係無日子....
諗住今晚返阿媽屋企食飯問啦~~~

到食晚飯, 我問三阿姨係邊日?
佢就向住坐佢對面既細妹講:
"唔係講咗星期五咩?
點解二家姐無同victor 講呢..... "

我就已經好"慶",
第一: 你地"傾"好咗?
我一d 都唔知,

第二: 係apps 問又無人答,
victor 講咗星期日,
你地既然傾好咗,
點解唔出聲講話應該係星期五呢?
我已經唔係第一次問,
咁當我係咩呢?
陌生人?

第三: 我問你嘢呀三阿姨,
你做咩好似完全唔理會我,
當透明咁,
淨係同細妹傾?
完全唔答我問題,
咁我係咩呢?
淨係細妹係你個妹,
我都係你個妹,
點解完全當我透明?

我個陣好"慶"好"慶",
好嬲咁同佢講:
"我依家問你嘢呀,
你淨係同阿敏講咩啫?"

佢仲係完全當我透明,
無答我嘢.....

我繼續:
"你地約咗星期五又唔出聲?
victor 係apps 到講星期日你地又講話應該係星期五,
你之前約我地食飯,
都係apps 到約,
家陣佢講唔啱你又唔出聲,
咁即係點呀?"

我心諗真係你講哂,
一時又apps, 一時又唔係.

跟住佢講話以後唔會係apps 講喇~

返咗屋企, 先發現三阿姨同阿敏都"離開"咗apps 組羣,
ok , 即係玩杯葛啦,
i don't care la,
係你地唔理我,
我可以做咩呢?
係我唔啱,
maybe 我以後都唔駛出席你地搞既活動,
因為你地係唔會通知我....

以前我搞,
從來都唔會咁樣,
依家唔係我搞,
就連通知都無,
嘿嘿嘿....
我算係咩?
我算係咩呢?

我就好似個傻婆, 陌生人,
無人理你,
無人話預你.
以為係一家人?
嘿嘿嘿...
錯喇,
唔止無地位,
其實係唔識你嫁.....

血併

自從奶奶出事,
好耐無行過街,
就算行街, 都無咩mood 買嘢,
昨晚因為老公約咗人,
得番我一個,
放工咪走去葵芳shopping~~~
我估大約七點到,
行咗三粒鐘,
其間無食嘢, 無飲水, 無坐低過,
不停咁行行行......

好耐無試過買嘢買得咁勁揪,
好盡慶呀~~~
買咗兩件外套, 兩件外衫, 兩對鞋, 三對絲襪, 一對耳環, 一個file~~
一個環保大袋都裝唔哂....

好開心~ 最開心買咗兩對鞋,
因為鞋依家嘢, 好難睇中....

其實行街時, 一路諗住要買衫,
下個月有朋友結婚,
心諗要買件衫著下~~
因為我太耐無買衫,
d 衫俾我著到起哂毛粒喇......

如果再有機會,
一定會再去血併.... yeah~~~

發夢

今朝好早就醒咗,
跟住瞓著後,
發咗個夢,
夢到自己有咗bb,
一直到生都沒做到任何產前檢查,
我覺得無咩問題....
跟住就醒咗.......

發夢, 係同現實相反,
即係又失敗喇....

係有小小失望既,
只係同自己講順天意,
就由得佢吧...

老公msn title: "4 Sep 萬國; 5 Sep 送別媽媽!"

已經請了這兩天的年假,
現在只是等待著...
見老公既心情都算平伏...
過埋依兩天,
事情先會告一段落...

奶奶, 一路好走...18/08/2012

今朝十點零, 醫院打電話俾老爺屋企,
話奶奶情況好危險,
要即刻到醫院.

我都未醒, 就即時要起身,
換衫, 擦牙, 洗臉...........

出門, 已經十點半,
去到留下大閘,
老公收到電話,
奶奶已經走咗....

去到醫院,
老爺佢地已經到,
但無人見到奶奶最後一面,
因為由姑娘知道心跳有問題開始,
唔夠一分鐘, 就去咗...

老公由去到醫院,
見到奶奶,
到大姑奶同三姑奶到,
佢都表面平靜.

到姑娘做最後安排,
到鐵箱到,
老公走咗出去,
跟住D 工作人員叫我地出去,
我先見到老公忍唔住喊...

我唔知可以做D 咩,
唯有跟住工作人員去到地庫...

其實喊得最傷心係工人,
可能係最後既日子,
工人都好貼身照顧奶奶,
奶奶對佢好似女咁,
所以感情特別好...

其次係二姑奶,
奶奶最錫係佢....

老公呢, 其實之前三晚老公因為要做嘢,
無見過奶奶,
諗住今日會去探佢,
點知一早就收到電話,
連最後一面都見唔到....

不過咁, 佢一生辛勞,
可以咁快就解決痛苦,
係好事嚟.....

最緊要身體健康...

身體健康

作曲：陳德健

填詞：林夕
編曲：溫浩傑

如若我　患了傷風 怕就怕你惹了我的咳嗽
連累你　發起高燒 跟我睡覺你也要分睡床
如若我　喉嚨腫痛 怎樣去唱你愛聽的歌韻
連累你　唇乾口淡 因要共我吃最淡的粥　最青的菜

＊我不要做弱質病人　變一個負累你不幸
　誰想有病　厭惡呻吟　我不要千金百銀
　也祈求這小小的福蔭＊

＃我只想　身體健康
　我害怕你要照顧我　擔心得出一臉倦容
　而我病床中反悔內疚　令你太心痛
　我只想　身體健康
　要活到過百歲不需拐杖都可跟你相擁
　不忍你勞碌的照料我 受了這種切膚之痛＃

如若我　跌短雙腿 我就算去那裡你都跟我
扶著我　輪椅中坐 親我時你也要俯身彎腰
人漸老　耳朵失聰 怎樣去聽你說我多可愛
唯願我　牙齒堅固 可吃盡你炮製我愛的每款小菜

Repeat　＊＃

我會為你好好的保重 我怕病了等於失了寵
怕你嫌藥味太濃　藥煲太重　不知怎操縱

Repeat　＃

我只想　身體健康
看著你替我蓋被　窩心得心有點痛
得到你這般的愛護我 眼淚這刻難自控

奶奶既情況

昨日探奶奶,
有小小發燒,
有小小胃痛,
有小小肚痾,
有兩個肉瘡.....
痛... 痛... 痛...

唉... 人生最緊要開心,
其實, 人生最緊要係健康...
沒有健康,
就沒有快樂,
沒有自由,
自己痛苦,
周邊人都痛苦...

兩日好頻樸

奶奶一直話要死要醫生同佢"做嘢",
仲同大姑奶講哂遺言應該d 嘢點做點做...
星期六下午飲完茶就上咗奶奶傾嘢..
最先就係問大家明唔明白奶現在係去到咩情況,
依樣嘢其實係講俾老爺知,
因為佢成日都無表達, 唔知佢知道幾多
(even 醫生同佢講咗咩事....)
跟住就係講咗奶奶張佢d 嘢點樣分配俾d 仔女,
然後就係傾奶奶既身後事想用咩形式,
依樣嘢, 最難搞都係老爺,
因為最難就係最初話無所謂,
跟住又話咁咁咁,
有時d 嘢, 唔係話你突然間要轉就轉到,
好似上次我地結婚單嘢就知啦... (好彩上次搞得掂咋)

其實我同大姑奶都好明白,
當日係唔會講到d 咩結論...
但就定咗星期日去睇"單位"...

到咗星期日, 八點半就起身,
真慘.... :(
約咗十點去沙田寶福山睇..... (真係熱到cc 下)
睇埋價錢, 拿埋都要廿萬一個位....

跟住行去就近既西林寺,
d 位同價錢都ok, 但我就覺得佢個"碑"係茶色..
好似黑咩咩咁, 我就唔鍾意囉....

睇完, 食飯... 下午, 再去粉嶺....
先到龍山寺, 我熟路啦~~~
先帶去六樓最貴既位睇.... 百幾萬一個... 真係呢~~~
個景就真係超級無喇,
但貴到嚇c 人呢....

走返落去睇薘瀛仙館,
好多位已經無哂,
而且好似好舊咁...
但老爺好似幾like 咁, 周圍去睇....
全部位都係露天既,
一來無咩位可以揀,
二來無人帶領, 行到身水身汗....

唉.... 好攰呀...

你會點揀? 你會點揀?

人生, 基本: 衣食住行....

如果, 你雙手不能動, 包括手指, 手臂....
同時, 你雙腳不能動, 包括腳指, 大腿....
同時, 你不能進食, 只能靠鼻喉"飲"營養粉....
同時, 因為插咗鼻喉, 說話困難....
唯一, 是你的思維無影響, 很清晰, 很清楚發生咩事....
有口難言, 有手難動, 有腳難動,
呼吸要用呼吸機,
食嘢要用鼻喉管.

你... 還想存活嗎?
周邊的人會擔心,
仍覺得你還生存.

但當你選擇離開,
脫離痛苦,
周邊人會傷心, 痛苦...

你會為別人而生存?
還是為自己脫離痛苦而選擇離開?

你... 你會點揀? 你會點揀?

心傷

昨晚去醫院探奶奶,
大姑奶話醫生同佢講過,
依家既情況最好就係要插喉,
因為佢喉嚨既肌肉已經無力,
所以已經食唔到嘢,
之前入急証時插咗既鼻喉唔可以除,
因為係俾營養奶粉佢,
但飲奶, 奶奶會肚痛,
所以已經轉咗其他嘢...

另外就係佢咁既情況,
唔可以係觀察病房,
要轉番E5 既普通病房,
而因為佢既情況,
依家只能夠係等,
唔可以出院喇....

跟住我同大姑奶入去睇奶奶,
奶奶又想講嘢,
但就唔知佢講嘢,
大家又超級無敵估估下.....
但今次唔成功囉....
 
我出番去, 見到老公...
眼淚忍唔住流出嚟,
即刻走咗去厠所冷靜番....

大家坐係的士,
心情沉重,
人生無常,
唯只能活在當下...

奶奶又入伊院

15/5 奶奶出院後, 聽大姑奶講佢係屋企情況都唔係太好.
好多時都要用呼吸機,
即係情況已經轉壞...

26/5, 奶奶個心口痛,
佢話要入院....

唉... 大家聽到都唔開心...
到咗星期日, 我地去探完奶奶...
老公好似無咩咁,
其實佢係好擔心,
整晚都無瞓過...
可能佢郁嚟郁去啦~
我都醒咗兩次...
兩次都見到佢"ma"大對眼....

依刻, 講咩都無用,
叫佢唔好擔心咩?
真係"side"氣啦~~~

今日, 阿ming 話去照超聲波,
睇下bb 係仔定女...

我係樹諗,
人生就係咁,
依邊箱為生病而苦,
那邊箱為生育而緊張...
人生離不開生老病死...


note: 今日牙"交" 又好緊...

牙"交" 好緊

今日個牙"交"超緊,
忍唔住問一問阿金,
佢問我咩事咁咬牙切齒,
我話無嘢喎...
我問佢咁即係代表咩?
佢話可能係緊張or 有野忍住唔講又好想爆,

可能係星期日抽天使牌問我會否有BB?
抽到是" 就去做吧"....
跟住昨天突然有一個人whapsapp 我,
佢識得生命數字,
話我會有突發性既事會發生,
我問佢是好是壞,
佢就問我係咪想有bb....

因為我怕希望越大失望越大,
所以一直唔太相信,
亦都無同任何人講...

神奇地,
講咗俾阿金知,
牙"交"又好似無咁緊....

阿金話:

信任當下就好，壓力大都對懷孕有影響的，只要做好準備，同天使講，我準備好迎接我的小朋友，放輕鬆就好了

好唔開心, 好失望

好唔開心,
因為奶奶已經十日去唔到大便...
谷住谷住,
同姑娘醫生"溝通"咗好耐,
終於俾咗瀉藥佢,
搞到佢好肚痛,
仲不停咁講好辛苦呀, 好辛苦呀...
見到佢咁辛苦,
我真係好想喊......

到走時, 佢只係話去咗少少..
跟住臨走時,
我去厠所,
見到M 嚟...
個一刻, 我超唔開心同失望,
但係...老公既心情更加唔開心,
我... 真係好想喊...

奶奶情況, 令人擔心~~

昨晚去咗伊醫, 睇到奶奶既情況,
好令人擔心...

聽大姑奶講,
醫生想幫佢插喉,
可以一了百了,
但大姑奶堅持要到最後一步先做...

事源昨日係約咗伊醫d人睇借呼吸機情況,
咁啱大姐夫又請咗病假,
三姑奶又係樹...
工人姐姐阿V 覺得奶奶昨日情況唔係太好,
叫咗奶奶不如入醫院,
奶奶當然唔好啦~
跟住話同大小姐講好唔好,
奶奶當然又係say no 啦~~~

佢地去到奶奶屋企,
見到佢好難呼吸,
面都白哂, 即刻call 白車...

三姑奶話, 當醫生話要插喉,
奶奶即場呆咗,
嚇到又再喘氣....

原來佢地話奶奶已經有放棄既心,
諗住係屋企唔得就算數喇...

唉... 其實我去到醫院,
我個心都實哂,
直頭講唔到嘢...

但最唔開心,
當然係老公啦~
佢昨晚都沒覺好瞓...
唉, 唔擔心就假喇...
我提都唔感提呀~~~