就由今日開始啦, 我打既report, 係想記低食完花藥既進度, 但我唔乖, 唔係日日準時食, 但我會努力的.
13 dec
日: 後日要exam, 一d 都無溫過, 今日男友去釣魚, 就去佢屋企溫書啦! 帶埋arden 幫我配個支, 再帶埋栗苞, 每隔兩三個鍾就飲4滴, 今日溫書溫得好慢, 無咩進度, 食完飯仲瞓咗個半鍾..... 一踏入十二月, 人未停過, 個心好攰, 人好攰, 所以想瞓, 就盡情瞓, 那怕要re-exam......
晚: 喉嚨有點"緊", 應該又係想喊但喊唔出, 成日飲咗4次花藥, 唔知有冇關係, 唔埋喇... 順其自然.... 今次好奇怪, 如果係以前, 時間咁緊迫都未溫哂書, 會好緊張, 但到依家都係平常心.... 奇..... 另外最近我見人就話自己好辛苦, 好唔開心, 好多嘢做, 以前我好少咁講, 講都係同自己既朋友講.... 唔知自己有冇石南(heather) 既問題呢?
14 dec
日: 今日全日都係溫書... 今日溫得有少少進展, 如果無進展就死得喇, 明日就要exam... 另外今日男友全日都留係屋企陪我, 佢又幫手cook 咗三餐俾我食, 其實有佢既支持, 我真係覺得好warm!
晚: 返到屋企, 又唔想溫書, 只係坐咗係廳睇明珠台既"極地雪狗", 諗住睇半個鍾, 一睇就睇咗成個鍾, 未做完就熄咗個電視. 唔好睇喇, 要溫書喇... 其實仲未溫哂. 攞哂d 嘢出嚟.. 見到部電腦... 唉.. 都係開一陣睇下啦.....哈哈.. 我唔係一個讀書既材料.....
睇咗阿金諗話好掛住ex, 我喉嚨就有點"緊", 但始終, 都喊唔出... p.s. 今日食咗三餐, 臨瞓前要提自己記住要食!!!
15 dec
日: 好努力咁溫書中, 食咗一次, 跟住只係食咗栗苞幫助讀書.
晚: 醒起無帶急救, 驚入試塲咩都唔記得, 好彩無事, 考完一科, 過咗一關.
16 dec
日: 返到公司, 又係忙死... 又要面對L/C. 好煩... 好彩最僧個同事今日無返, 唔係又會發脾氣..... 成朝不停咁呼氣. 但, 想放棄份工既感覺又無咁重....
晚: 以為無事先至最驚. 下午食完飯, 又係超多嘢做, 做唔哂個隻. 到咗大約七點, 同事們都走哂咁滯, 聽到後面個同事都話好快會走, 即係又係得番自己一個人做... 唔知咩事, 悲從中來, 滴咗兩滴眼淚, 係stop 都stop唔切... 抺一抺, 再做嘢啦..... 到九點半, 最後一個人都走啦! 未做完, 唯有continue 做做做..... 十點半, 走人!
去搭巴士, 等咗一陣就有車, good! 上到車, 同fd 傾咗一陣電話, 得番一個人.... 諗下諗下, 覺得自己好lonely, 好慘, 點解自己會咁忙? 忙到無時間食飯, 無時間返屋企食飯... 眼淚又流... 嘩... 係巴士喎, 唔係化.... 都係忍唔到...又流咗幾滴..... 到轉車, 搭van 仔, 由開車, 到落車, 前後大約15分鐘, 眼淚不停咁流..... 真係大獲... 平時會諗唔好喊, 因為喊咗唔靚, 又肉酸..... 今次, 真係停唔到.... 到落車, 行返去都無事, 返到屋企, 爸媽瞓哂覺, 放低哂d 嘢, 走去廚房食飯, 見到碟餸, 得一個人食.... 眼淚又流過, 一樹食, 就一樹流.... 直到飲完碗湯, 淚停咗.....
17 dec
日: 因為昨晚喊完既關係, 對眼好腫下... 其實諗住今日sick leave, 但最後都無做到, 都係返工喇, 我好似有d 工作上既嘢要clarify番先得....
晚: 又係做唔切呀, 我做得慢, 又唔太識, 兩份L/C, 做咗我成日, 其中一份仲要無之前既reference 睇番嚟做, 唉... 死得啦... 做做做, 做到五點, 死火, 做到銀行都收工.....唉... 睇嚟張L/C, 都係開唔切, 點知原來份死人L/C係唔急既, 俾完一個睇錯哂, 跟住俾阿姐睇, 有d point 唔應該咁打咁打... 我鬼知咩? 有人做咗三年既員工, 睇完都係錯, 我都無計嫁? 我都話明我唔識嫁啦.....
做下做下.... 好想好想即刻放低哂所有嘢離開公司... 個一刻真係想即刻resign 走人, 要補錢就補錢啦.... 做咩咁辛苦? 打工咋喎, 想做死人咩? 眼淚又想湧出嚟.... 收住.... 後面同事話: 算啦, 由得佢啦... 眼淚又想走出嚟.... 忍忍忍... 收住....
今晚放工無咩特別, 只係諗番昨晚係因咩原因而喊呢? 係辛苦? 係lonely? 係個個走哂, 得番自己一個人所以慘? 我到依家都諗唔到點解???
18 dec
日: 今日exam, 無咩信心, 因為唔知佢考咩嘢! 一早返去學校圖書館溫書, 一坐低, 第一件事梗係食栗苞先啦... 當然仲有阿sir 個樽啦.... hehe ... 我仲帶埋急救, 以防萬一!
晚: 考完, 唔係太好, 好多都唔知自己答咩? 其他組員都唔係好得去邊, 有d 起碼無咗20分, 因為答唔切, 唔夠時間... 考咗三個鍾, 真係人都癲.... 但我個心無咩特別, 係有點失望的, 可能預咗re exam, 所以心情比組員好一點.... 臨走我仲可以開玩笑.
但, 點解我面對工作, 我就唔能夠放開一點? 我真係有點怕自己係因為唔鍾意改變而成日話自己唔適應..... 我真係唔想返工.....
19 dec
日: 今日玩sick leave, 還掂返到公司, 唔係我錯都入埋我數, 不如我真真正正玩嘢, 又睇下阿姐點睇囉, 我明玩sick leave, 因為我昨天星期四exam 完, 今日可以休息下之餘, 明天又要exam 最後一科, 順個便可以多少少時間讀書, 最玩嘢係我下星期一, 二, 三都放假, 即係直落放咗九日.... 下星期六我會返工, 如果星期六做唔哂, 星期日都會返埋, 我唔係無責任心, 只係我唔咁樣放, 我覺得我個心理會唔平衡, 同埋我嚟緊既時間都唔會有機會俾我放咁長, 所以... 玩嘢咪玩嘢囉, 最好炒埋我添呀.....
晚: 真係無咩心機溫書, 又唔知點溫好, 食完午飯想"恰" 一陣, 先發現自己今日無帶水晶.... 嘩.... 連水晶都唔記得帶, 真係好耐未試過... 唉... 人大咗, 連記性都差埋.......... 家陣仲要玩讀書, 記L/C點做..... 真係搞鬼!!!
20 dec
日: 努力讀書中, 但唔知點解, 已經無之前咁進取... 讀到無哂心機, 可能係最後一科喇....
晚: 讀到4 點幾, 唔知點解個人開始驚驚地, 食完栗苞, 再飲兩滴急救先... 考完試, 算OK, 應該有把握合格... 即係三科其中兩科合格, 只有一科可能要重考... anyway, 已成定局, 要重考都等下年喇... 哈哈哈........
21 dec
日: 同男友和自己屋企人飲完茶, 出咗去荃灣行, 買咗一件人生咁耐以嚟最貴既一件外套, 原本諗住買一件平少少既, 但既然買, 就買件暖d 啦... 件外套係風樓, 入面係件羽絨, 其實心諗如果將來有機會冬天去日本咪可以有用囉.... 嘻嘻嘻....
晚: 同男友屋企人食飯, 今日係冬至, 佢地做正日... 食飯唔係問題, 最怕問幾時結婚..... 好彩.... 順利過渡.... 嘻嘻嘻...
今日無端端發呆, 又發脾氣, 我諗應該係就快經嚟喇....
22 dec - 26 dec
五日會去台灣旅行, 休"打"五天.......... 
