奶奶撞嘢定發惡夢?

昨晚如常去探奶奶,
差唔多行到醫院門口,
我問老公: 依條醫院路, 好似由四月開始行喇....

上到病房, 見到奶奶精神好似唔錯,
但見大姑奶眼紅紅咁....
過咗一陣, 大姑奶開始講喇:
"阿媽話昨晚瞓唔到呀, 話見到d 人,
攞住d "打包"入嚟, 放係佢右邊床地下喎....
咁我就問佢, 點解放係右邊唔放係左邊呀?
佢話咁樣會阻住d 姑娘做嘢喎...
咁再問佢係點入嚟啦?
佢話係窗口邊邊入嚟喎,
咁再問佢點樣拎走啦~
佢話攞去廁所個邊喎
(因為奶奶依家住緊隔離病房, 係以前用既房,
依家只係用嚟放有呼吸病既病人, 並唔係奶奶因為咩事要入依d 病房,
而隔離病房係有個獨立廁所既)

唔怪得之大姑奶咁既樣啦,
俾我聽到都嚇咗一跳....

跟住奶奶又講第二樣,
話佢老公同大姑奶, 二姑奶同阿明,
見到佢地係樹執房....
奶奶叫極佢地都無人應....

大姑奶話: 我地點會唔理你喎,
你唔好亂諗嘢啦~~~

有人問: 今日有冇醫生嚟呀?
奶奶話: 明明叫你同醫生講,
我既意願係無變到,
叫佢快d 手做嘢啦~~~
又話大姑奶唔同意d 藥,
大姑奶好大反應,
話我無唔同意喎....
我地一直都知道你既意願嫁...
你唔好亂諗嘢啦~~~

最搞笑係: 見到阿V (即係工人)
同佢講, 你係點樣嚟嫁?
阿V 話搭巴士囉...
奶奶話: 唔駛嫁, 搭lift 就得喇...
阿V 就好奇怪啦, 就問: 係咪搭的士呀?
奶奶好堅決咁寧頭, 話淨係搭lift 得喇....

跟住奶奶突然話叫我地拎開個"袋",
大家都望住前面, 心諗都無嘢,
唔好嚇我地呀大佬....
邊有袋呀?
當大家你眼望我眼時,
大姑奶叫奶奶指俾佢睇,
原來係個呼吸器有個蓋彈咗出嚟,
佢近睇以為係個袋....
但依個呼吸器, 已經帶咗成個月,
依家先嚟發現???

用咗好多時間嚟估奶奶講咩嘢,
大家既心情都十五, 十六....
奶奶又講喇: 阿V, 你仲唔去煮飯?
我地話好好好, 阿V 你搭lift 去留下煮飯啦~~~
大家都笑笑口咁.... 明知係講笑....
奶奶見阿V 仲企響樹,
又再講: 你快D 去煮飯啦~~~
我就話喇, 你快D 搭lift 去喇,
跟住細細聲話你轉頭就入番嚟話煮完叫我地食咁囉....

阿V 覺得好搞笑,
唯有笑住行出去,
一陣佢又行番入嚟,
笑住話已經煮完喇....

跟住大家同奶奶蓋好被,
搞完一輪就離開....

我其實覺得係奶奶因為長期既藥物影響佢,
開始神志不清,
而佢見到個D 嘢,
其實可能係發惡夢...

但老公怕佢真係撞嘢,
因為始終都係醫院,
一日進進"出出"既人咁多,
而且係昨日先有咁既奇怪說話.....

再睇睇情況吧...