爸爸提起阿女發燒...

爸爸提起次次我生日, 總會有人病, 我話因為二月份, 一係14號, 一係26號, 你一定會買花囉... 點解今次阿女病得突然? 我估係佢第一個接花, 跟住我放咗D 花係廰度, 收花係夜晚嚟, 個陣阿女仲有D 咳同痰, 真係第二朝起身, 阿女燒成39.3度, 我後知後覺, 即刻將D 花搬走咗去近窗, 跟住我就好忙咁俾水佢飲, 度溫度, 夾手指, 好彩阿女識講, 話想買沖涼, 沖咗涼已經落番去38度幾 去到診所度係38.1喇, 已經跌咗足足1度, 點解我咁驚因為佢真係好攰, 去到診所直頭無落過地, 咁啱既佢都無食嘢又嘔過一次, 跟住係診所嘔過兩次 醫生都驚阿女係流感, 寫定醫生紙, 如果真係唔舒服就要入QE 返到屋企都11點半, 爸爸同佢度溫度, 已經去番37.5度喇... 我信邪, 一定係D 花既問題.

目標

很想的起心肝, 每天做運動, 每晚早D 瞓..... 我要身體健康, 先可以照顧阿女... 因為近排見太多不開心事, 公司兩個同事爸爸走咗 跟住阿嬸2月2晚, 又走咗 24號Alex 都走埋.... 佢地都係家庭支柱

阿女病了

昨日爸爸買了花和生日蛋糕, 但因為係杉玉食得太飽, 所以無食到個蛋糕. 點知今朝一早起身, 阿女發燒去到39.3度... 有冇咁邪門呀? 真係放花就有人病.... 又發燒又嘔, 檢測過又無事, 但阿女勁攰 去咗睇醫生, 佢話無理由會咁攰, 寫咗醫生紙, 如果真係唔舒服要入院查下. 去到12點, 見阿女食咗藥好似好D, 就返半日工喇...

今天生日

很久沒有寫過BLOG.... 今天約了CPN 同事食飯, 到正潮樓, 竟然嚟咗個驚喜, Vikki 都嚟食飯... 好開心傾咗一個鐘, 咩都傾無話就住就住... 食得好開心... 今晚估計留係屋企食, 靜靜度過...

Ming生日

2025年10月21日又係阿Ming生日，今年佢工作有危機，7月到依家淨出糧唔駛返工，有時間，我又有大假，可以正日同佢慶祝，好耐未試過，之前諗咗好耐去邊度玩，原本話食海鮮火煱，後來諗去Neway CEO 唱 K Lunch。

嘢食就唔好食喇，但唱歌竟然唱咗4粒鐘，2個人咋，不停唱，唱到聲沙，但超滿足。

叔叔，一路好走

老爺細佬，叔叔，2022年3月3日走了

今天3月18日是出殯和火化日子

因中新冠而亡

一切從簡

11點至1點喪禮開始

1點致3點火化

守夜都沒有

叔叔印象中

博學多才

特別中文

我望塵莫及

只可惜老爺神智尚未清醒

不想過多刺激

還未告知叔叔此事

夢見老朋友

最近夢到零星夢

都有少少記得

例如夢到老公叫醒我

今朝零辰竟夢到老朋友吳穎悅

病了，搬屋到得細的單位

但其實是很有錢的

見到她還跟她擁抱

阿女又入院

12月尾，約咗爸媽佢地食冬至飯

都知阿女有啲唔舒服

但約咗18號中午去荃灣食飯

老豆仲攞埋滑板車玩

玩咗足足大半日

係有咳

但唔算嚴重

點知去到晚8點左右

開始有燒

即時食退燒藥

有痰，仲食埋化痰粉

但食咗退燒藥差唔多4粒鐘又嚟燒

仲下下38.x

到零辰6點真係頂唔順

叫咗老公起身早啲去QE

早去好似無咁多人咁

7點到

10點可以上隔離病房等驗新冠

驗咗無事

轉房喇

大獲

今次係大房

入去得一個case

但到夜晚已經入咗6個小朋友同6個大人

真係迫又嘈

完全瞓唔到喇

2粒鐘到叫醒食退燒藥兩個鐘又要聞氣

其他人

都係迫叫醒又喊又叫

真係人都顛

阿女度到39.9度

都無藥食

係醫院真係無分別

係都要夠4粒鐘先食

瞓咗兩晚

諗住退燒可以出院喇

話哂今日係正日冬至

點知話我知要轉院

去香港兒童醫院

嘩，邊度嚟嫁?

無事都要轉院

返屋企瞓喇

諗到如果放工去又遠

第二朝返工唔知幾點先返到公司

樸嚟樸去

我真係頂唔順呀

好彩捱咗一晚就走人

人老真係唔夠瞓會全無精神

今次係咩濾過性病毒

咩嚟呀？

我做咗業主

完全無planning 點解我會做咗業主, 

睇咗兩個單位就決定買. 

真係到依家我都覺得好amazing 去睇, 

本來唔想去望, 

因為唔近地鐵, 

但一入到去 

好鍾意入面既環境 

好舒服, 好正, 

同埋見個價, 

我之前計過應該afford 到, 

所以就答應咗... 

 PARK YOHO: 6 April 2021 簽臨約(428萬), 251呎 

5 July 2021 取鎖匙, 裝修(4萬) 

22 July 2021 裝修完 

27 Oct 2021 搵美聯獨家搵到租客 簽約兩年, 預付六個月租金, 2個月按金 

8 Nov 2021 簽正式合約, 免租期10日, 交匙大門信箱各一, 

18 Nov 2021 正式出租 

18/11-2021 - 17/11/2023 

下次收租18/5/2022 

 其實搵單位那個地產, 

第一日放我飛機, 

嘩, 我好遠嚟, 跟住又走番屋企... 嬲.... 

但佢say sorry 

我俾個機會佢 

但講真佢跟得唔好.. 

不過算喇... 

同我跟裝修, 都係另一個Timothy 跟, 

佢好似無咩做過嘢.... 

 跟住放租又唔見我條匙, 

又話要我親自放底匙係分行... 

原來係要簽文件... 

真係咩都唔做 跟住到樣好過份....

阿女入院記

2號晚阿女突然發燒, 

以前嚟講, 已經好驚, 

 會想即刻入院, 

但依家疫情咁, 

都唔敢隨便入院, 

佢依家發燒, 

就係入都要入QE, 

唔可以入法國... 

 佢一直燒, 其實怕係肺炎, 

同咗老豆講咗, 

我成晚, 兩點一醒 四點一醒, 到六點一醒, 

發現阿女流大汗, 頭髮, 著住件衫都濕哂, 

即時同佢換, 

又同佢吹乾個頭, 

跟住就退咗燒, 

但安全起見, 

去咗黃錫偉睇, 

 醫生話見佢好似無咩嘢, 

但氣好喘, 

俾咗封信叫我地入QE 

照照安全D, 去到醫院, 

當然係等等等.... 

我諗住好似上次咁, 

好快睇完就走人, 

仲背住盒飯.... 

 搞咗半日, 

醫生話入住院.. 唉... 最怕依樣... 

因為疫情, 

阿女要染有冇中新冠, 

係染病毒個陣染埋流感個D 原來中咗鼻病毒... 

要入院, 等報告, 當然要種豆.. 

見佢無哂心機 

原來種豆個陣係三個人襟住阿女... 

我見到個陣阿女眼紅哂, 勁唔開心, 

我個陣就喊咗出嚟... 

真係好痛囉..... 

今次入咗2日院, 

最緊要係聞氣個part 

因為佢入咗院都無流鼻水個D, 係氣喘... 

但我就中咗招.... 

原本我都睇住中醫, 

但咁啱我M 嚟, 

醫師知道咗都無計 

只能落輕藥...

好耐無寫BLOG

突然又好想寫番, 

因為太耐無寫, 

又成日唔記得事情, 

寫底係一件好事嚟 

 7/11 行過九龍接收水塘, 

真係好耐無行喇, 

自從有咗阿女之後, 

咩都懶哂, 

咩都唔想做 

做完家務 

成個人都散哂.....

驚...

上星期四睇醫生,
因為覺得似作感冒,
今個星期一又去睇,
照食藥喇...
星期二, 無端端又嚟少少血...
星期三又有...
雖然唔多, 但搞到我心驚驚..
無事麻...
係因為食咗藥?
定係唔乾淨?
因為每次有少少陰陰痛,
去小便時就會有少少血...
其實血色, 好似粉紅色咁,
唔係紅色...

真係搞到個心唔定...
老公又想搞嘢,
我又怕有問題,
唔敢同佢講,
驚佢話醫師唔得,
今晚見到醫師一定要問一問...

靜落嚟, 忍唔住喊

昨日M 嚟, 痛到唔想郁,
心諗一定要同醫師講...

去到金鐘,
醫師第一句就話:係咪嚟咗喇...
我話: 係呀, 仲好鬼痛添...
醫師: 唔緊要喇, 我地重頭嚟過呀下...
我話: .......醫師點解今次嚟咁長, 又脹痛, 又好辛苦... 依家仲痛緊...
醫師: 你今日嚟, 有冇一舊舊呢?
我諗咗一陣: 嚟個下好多血, 應該有吧....
醫師好輕聲咁講: 其實之前把你脈, 都有滑既蹟象...
我心裏突咗一突, 即係有機, 但我唔知做過D 咩嘢, 無咗?

當其時, 醫師一直都話係罐汽水問題, 又唔聽話, 一定要去旅行, 所以下次要小心D 喇... 跟住又話星期六要做針灸...

去到地鐵, 打機... 快落車, 收埋個電話, 個人靜落嚟時, 有一種失望, 失落, 唔開心既感覺, 即時眼濕濕... 雖然醫師話係汽水問題, 但嚇鬼咩? 不其然想係自己咩問題...自問上星期, 我盡可能早休息, 連行山都無去, 星期六, 日多數留係屋企, 少郁動, 食嘢又清淡, 點解都係咁呢?

醫師有講過一句, 可能未係時候囉...

總之, 依一刻心情, 真係差透...

昨晚, 第一次喊, 係沖涼時...
沖完涼, 瞓上床, 老公抱住我時, 就真係失控.... 老公問我咩事, 我講唔到...

相信, 依件事好快變成微塵一樣, 不在心上.

11/9-15/9 星加坡之旅

今次旅行, 自遊行喇...
好唔好彩, 撞正星加坡有寨卡病,
搞到戶外活動, 多數係商場依d 室內地方,
至於動物園, 有叢林的地方, 都唔會去,
我仲諗住誇星加坡去馬來西亞legoland 既計劃, 要下次無事先會去喇...
雖然係咁, 用一種遊閒既心態,
覺得今次既旅行, 好舒服.
食得多, 買既唔多,
老公食到佢like 既胡椒蟹,
雖然我要戒口,
但食咗先算lu...
仲有雪糕夾威化餅,
每日一舊, 好正...
基本上, 唔食得既嘢,
我都食哂,
醫師叫我唔好去旅行, 要戒口,
全破呀....haha

痛苦的兩星期

話說, 我應該5/11 嚟M,
早係一個星期前, 個肚就開始脹脹痛...
一復一日,
問過醫師, 佢無講D 咩嘢,
只係每日食中藥.... 食中藥...
我都好乖咁... 每日食藥, 戒口...
到5號前, 醫師就叫我,
小心D 呀, 唔好亂食嘢, 唔好拎重嘢...
到5號, 未嚟...
到6號, 晚間時, 好似嚟咗, 因為係好淡色, 因為佢淡到唔細心睇都唔覺....
到7號, 一早嚟咗少少... 當晚就同醫師講, 佢話, 有D 人有咗都有機會有少少血出嫁....
我心裏突咗一突.... 醫師仲話唔好話俾老公知住... 嘩... 講到似層層咁...
到8號, 我忍唔住, 用咗支驗孕棒, 答案係NO..... 我心裏不期然放鬆哂, 當日雖然只係一早一晚出咗少少, 但個肚起碼唔脹脹痛痛先喇...
到咗今日9號, 脹痛, 又跟住我嚟喇... 食完午飯瞓咗一陣, 即時大量嚟咗一次...
終於M 大人嚟咗喇........

心煩氣燥, 因為在乎

下巴生暗瘡,
都知有嘢.

之前問過老公要唔要小朋友,
佢一句話要,
我就即刻做嘢,
做咗一個心想事成既火供,
放棄咗同媽媽好既關係,
要達成有小朋友既心願,
連阿sir 都覺得我唔係太鐘意小朋友,
問我係咪真係要嫁?
我話有咗, 我唔會放棄,
阿sir 可能覺得我兒戲,
但本住最大得益,
都係同我做咗,
除咗火供,
仲要我讀經,
食d 有益食物,
十二點前要瞓覺,
好好暖住肚, 腎位同腳跟位.

我唔算做哂,
但讀經, 我每日都有讀,
食有益食物, 我盡做,
十二點前瞓, 我係有幾日做唔到.

但老公,
昨晚竟然唔係因咩原因,
返嚟時飲到嘔,
今朝問佢係咪唔舒服,
佢話唔係,
因為飲多咗...

你係要小朋友,
就節制d 啦,
我唔想第時有咩事,
要我嚟怒你因為飲酒出事....

我真係好嬲,
我就小小心心,
你就懶懶閒,
我心勁唔舒服,
成朝都怒氣沖天...

現在比較好d 喇,
但咁既心理情況,
唔會有機會囉...

又令我諗起,
係咪特意/暗示話我知,
其實你地唔好有小朋友比較好呢?
定係俾個考驗我呢?

心情差透

M嚟得好少，
但即表示又失敗，
已經唔開心，
十月，等咗成年，
無得放喎，
佢仲覺得無咩嘢咁，
唔得又唔話我知，
到依家先嚟講唔得，
又唔講幾時得，
咁即係點?
幾晚都好憤怒，
平日無咩嘢，
係見到佢就嬲死人😠

前世今生

昨晚係書局睇一本書,
個本有一部份講及前世債, 下世債還,
講及生病受苦,
可能因為前世債,
今世到時候,
要當時人受苦,
才可能得到解脫,
令我想起奶奶,
她是一個好好的人,
一生努苦,
退休時, 沒得到什麼時間享福,
就因為一個唔多人知道既病,
唔久兩年, 就痛苦的病死了.

聽聞奶奶家族都有人因此病死,
只因為香港醫療好,
所以生命得以延長一點...

我想, 是否前世, 或是前前世,
做了什麼事情, 影響到家族有這病?

曾說過, 一出生, 命已注定,
有什麼劫數是難以躲避的,
但若果一生積福,
或可避過一劫,
以前總是聽人講得多,
但睇完, 突然好有感觸...

跟住再睇, 有一段講個女仕,
想生個仔, 但生極都係女,
原來佢先生前世係一個道士,
專幫人由生女變生仔,
因此, 到依一世,難以生男,
問道有沒有解決方法,
因這問題在於男方,
就算女方多積德, 都沒有用...

令我想起媽媽一生生六女,
沒有男出;
而我到現在還沒所出...
是否因為我做得不夠?
還是我老公做得不夠?
這真不知道...
只有做好自己,
天作決定.

後記: 睇完, 一路回家,
心淬不靈,連屋企樓下既密碼都記錯咗.
即刻開佛歌聽,
慢慢心境平靜番.

不解

點解每次提起佢，
都會無名火三丈起？
同佢前世有仇？
真係唔明？

無端端有水

唔記得係十一月十三號定廿號喇,
個晚老公飲大咗,
醉咗返嚟,
我就上咗床瞓,
大約三,四點度,
我知老公唔係床上,
跟住見到佢坐咗係床,
跟住瞓底,
我當時已經聽到有水聲,
問佢聽唔聽到,
問咗幾聲, 佢又無應,
應該係醉咗喇,
我忍唔好奇, 落床睇下,
見到床邊有一大灘水,
我問佢點解有水,
佢話唔知喎...

4 隻拖鞋,
係整濕咗我一隻,
好似特登整濕咁...
老公起咗身, 我攞咗塊毛巾出嚟抺,
佢就幫手抺,
後來我再攞多條嚟抺,
我抺哂d 水,
再瞓過

第二朝醒咗,
再問老公,
佢又係咩都唔記得...

老公講咗單嘢俾人知,
有個高人話佢知,
可能係有人想"拜訪"我,
但我唔show 佢,
所以特登整灘水話我知...
其實我咩都唔知道喎~~~
我又feel 唔到....