有咗昨日既經驗, 今日既target 就明確好多喇. . .
原來想去睇既場, 有好幾問都唔駛去,
因為唔係樓底矮, 就係有粗柱,
可以慳番d 腳骨力呀. . .
同埋因為昨晚最後一間問咗,
竟然無場喎! 真係唔到我同男友心急...
最初諗住尖東, 美麗華, 同海港城個邊,
之但係咁樣即係行哂全尖咀, 好大獲,
再睇多一次d 資料, 知道今日好難會行哂咁多地方,
所以我先主力行尖東, 因為尖東多酒樓/宴會廳:
尖沙咀好彩, 帝國中心B1/F: 因為行去尖東其間見到帝國有御苑皇宴, 所以行去望望, 點知俾我地見到好彩, 就走入去望下, 個樓底一般(算矮), 但好在係全海景, 我地一講個日子, 佢話無場. . . 又令我地嚇咗一嚇, 駛唔駛咁full 呀. . .
尖沙咀御苑皇宴, 帝國中心1/F: 樓底一般啦, 佢有兩個場, 一個場近海景, 已經book咗, 得番另一個廳, 其實係好grand, 我地今次先問有冇場先, 佢話有喎. 我地即刻問下d 資料啦, 點知個陣十二點半, 負責人未返, 我地留電話, 轉頭再傾. . .
尖沙咀幸福, 幸福中心: 網友話新, 好靚, 但睇到個場, 舊裝修, 又暗, 樓底又矮, 中式, 雖可包場無上限, 男友估應該上手留底, 再係咁易裝下就算.
尖沙咀富臨, 安達中心B2/F: 之前去過飲茶, 但唔記得喇, 睇個場, 樓底一般, 可包場無上限, decor 一般.
(此時男友收到call 話御宛那個負責人返咗, 我地諗住行埋先去)
尖沙咀東海, 東海商業中心B1: 樓底一般, 尚算高, 但問日子時, 話下年十至十一月會裝修... (咁緊係走人啦)
尖沙咀潮州城, 東海商業中心1/F: 14/8 啱啱開業, 即係開咗兩日, 連菜單都無, 樓底算矮, 裝修一般, 背景板未整好, 唔知係點, 但見D 人似係大陸團嚟香港食飯. . .
再去返尖沙咀御苑皇宴, 背景板可電動轉中/西式, 即要做定兩款字樣; 兩邊有射燈, 話每年八月都會有少裝, 咁啱下年八月會有個大裝, 都幾吸引, 夠新麻, 台咗面係新娘房, 前面有個piano, 可以自己搵人彈, 包的; 另酒水八點前free , 入場有射燈各樣, 講明咗只係有幾樣價, 菜價, 任飲, 客人椅套, 枱前的中文同英文字.
負責人話菜價同任飲係set 咗, 唔可以減, 留意佢菜價係未計加一, 即係一個$4988 既套餐, 都成$5500, 仲有任飲係set定$380, 即係每圍最少起碼$5905, 佢minimum charge 係九萬八, 咁即係要成十七圍先夠唔會賠, 而如果真係唔夠圍數, 就食貴餐囉. . .
嘩, 要成六千蚊一圍, 唔係我地budget 之內囉, 但又怕周圍無場, 點算好呢? 我同男友講不如再行下先啦, 反正仲有時間, 因為講真價錢最重要, 佢個場係靚, 係grand 而清, 好美, 而且佢應該跟得幾好, 話有人專門跟我地既case 到俾錢一刻, 諗咗好耐不如再行下先. . .
跟住記得阿朱話佢訂皇上皇, 咁就去咗中港城
去第一樓, 第一間話無場, 第二間又係無場. . . 真係嚇死, 去到第三間, 皇潮匯, 佢話有位, 即刻去睇下個場先, ( 其實個陣我已經無酒樓可揀可行, 即管見步行步)
去到個場, 原來仲裝修緊, 話21/8先重開, 而個細場, 係剛剛租的, 所以會重新裝修, d design 裝修都係全新既, 咁ok 呀! 一年後d 嘢都唔算好舊, 最緊要係有場麻, 睇個場其實好grand, 用羅馬場既概念, 好似整得幾好咁, 都算清, 咁當然無御宛皇宴咁靚, 但都算好靚下喇. . .
再睇番d 價錢, 菜價一落實就唔改, 因為價係直到2012年八月既, 仲有係酒水同小食, 八點前都係包埋既, 咁依樣"御" 就做唔到喇, 而任飲只係$280, 我話有人介紹, 佢減咗$30, 其實佢本嘢mark 咗任飲係$380, 都唔知係佢出錯定係咩嘢, 總之就平咗喇.
仲有一樣嘢勁, 就係明明可以擺21圍, 佢話10圍已經可包場, 雖然我地要19圍, 但我地只係落10圍就得喇, 每圍$1000, 只係俾一萬, 但"御"要俾$10,000, 二個月內要俾min charge 既三成, 咁即係今年要俾咗差唔多一半既錢, 仲要terminate 咗無得退回, 真係無理呀, 但皇潮匯就唔駛, 俾咗一萬, 個d 優惠卷已經俾埋我地, 等我地可以早d ready 其他嘢...仲有係我地無講, 佢都加多印貼, 俾到一圍12張, 我見其他最多一圍八張, 佢本身已經係10張, 仲俾埋優惠去到12張, 真係咁都得呀!
可能係寶物尋最底, 我地已經係好攰好攰, 俾我預到依d 咁好既offer, 我地最後決定落訂喇.
)