又提出喇, 不過令我發現到...

話說男友啱啱從韓國出差返港, 星期六, 又係初十四, 我接咗佢機, 先知AY 約咗佢團拜, 而我又約咗KITTY 佢地去STEPHEN 愉城屋企...

團拜完, 男友打俾我, 問我明天飲茶飲幾點, 佢要較鬧鐘. . .

跟住佢又問我 : "其實你想唔想結婚呢?"

我話:  "... 想.... "

跟住我話自新年開始, 好多人問我依個問題,

佢跟住唔理我: "咁你快D 問下你家姐啦..."

我話: "吓, 佢結咗好耐喎, 都有成廿年, 問佢邊樹知呀, 同埋依家都唔同哂啦. . ."

佢無言... (我懷疑佢跟住已經瞓咗, 因為跟住既對答, 我第二日問番佢, 佢竟然話唔知??!! 但佢答到我個喎...)

我就問佢: "係咪因為有人問你幾時結婚所以問我呀? "

佢答: "係呀, 我阿爸阿媽吹我結婚囉..."

其實我驚佢係因為人地問佢結婚而結婚...

停咗一停. . . 佢話: "咁明天去飲茶同你阿爸阿媽講話結婚好唔好呀?"

我當時嚇咗一跳, 唔係化. . . 咁快同佢地講??? 我未ready 喎. . .

我都唔記得當時有冇答佢. . . 好似轉咗話題,

跟住我問一句, 佢答一句, 不知不覺, 佢竟然瞓著咗. . .

嘿嘿嘿. . . 大佬, 你講真定講假呀?

到咗二日, 飲茶時, 佢竟然問我: "我昨晩返咗屋企, 有冇打番電話俾你呀?"

啤一聲呀. . . . . . . . . .  即係昨晚又係講講下啦. . .

跟住我問佢: "你昨晚有冇飲酒呀?"

佢話有少少喎. . 兩杯仔紅酒. . .

其實再加上佢啱啱落機, 飲埋紅酒, 係會好易瞓著既. .

但佢瞓著咗都可以答我問題, 就真係. . . 有點勁囉, 只係答咗咩就唔記得喇!

我悟到一個道理, 如果佢飲咗酒, 答應咗咩, 講過D 咩, 都會唔記得既...................